Mae datblygu sgiliau digidol ein staff a'n myfyrwyr ar flaen strategaeth y Brifysgol, ac mae'n sail i lawer o weithgareddau'r Brifysgol gan gynnwys ymdrech y sefydliad tuag at ddysgu cyfunol a datblygu strategaeth ddigidol sefydliadol newydd.
Mae'n bwysig ar lefel unigol a sefydliadol – cynyddu effeithlonrwydd a mantais gystadleuol y sefydliad, darparu addysgu o ansawdd uchel i'n myfyrwyr gan ddefnyddio technolegau cyfredol, gwneud y defnydd gorau o offer a dulliau ymchwil digidol a galluogi ein staff a'n myfyrwyr i weithredu'n effeithiol mewn byd digidol.
Daw myfyrwyr i'r Brifysgol gyda disgwyliadau uchel a chynyddol o'r ffyrdd y dylid defnyddio technoleg wrth addysgu a hwyluso eu haddysg. Byd digidol yw eu byd nhw – maen nhw’n disgwyl y bydd y rhyngweithio â'r Brifysgol yn ddigidol, bydd y dysgu a’r addysgu yn ddigidol, a mynediad di-dor 24 awr at adnoddau a thechnoleg ddigidol.
Er mwyn bodloni disgwyliadau myfyrwyr, ein nod yw darparu amgylchedd dysgu ac addysgu digidol o'r ansawdd uchaf sy'n gwneud y defnydd gorau o dechnolegau newydd a thechnolegau sy'n datblygu. Mae hyn yn gofyn am staff addysgu sydd â sgiliau digidol datblygedig ac sy'n alluog ac sy’n gyfforddus wrth ddefnyddio technoleg i gefnogi addysgu ac asesu arloesol. Mae dysgu o bell ar raddfa yn datblygu'n gyflym, ac ar gampws, mae ein mannau dysgu ac addysgu yn parhau i wella. Mae'r datblygiadau hyn a datblygiadau eraill yn dangos y gofyniad parhaus i staff yn y Brifysgol ddiweddaru eu sgiliau digidol yn barhaus – ar gyfer addysgu ar-lein, cyfunol ac ar gampws.
Ym maes ymchwil, mae sgiliau rheoli data digidol a delweddu yn hollbwysig, yn ddieithriad bellach mae gan gyllid ofyniad digidol, a bydd rôl technoleg wrth gynnal ymchwil yn parhau i ddatblygu.
I'n myfyrwyr, rhaid inni ddarparu cyfleoedd i ddatblygu sgiliau digidol am eu hamser yn y Brifysgol a thu hwnt, boed hynny yn rhan o addysgu cwricwlaidd neu drwy ddysgu annibynnol y tu hwnt i'w prif raglen astudio. Gall sgiliau astudio digidol gynnwys chwilio am lenyddiaeth yn effeithlon, rheoli data, sgiliau cyfathrebu a chydweithredu, a gallu dysgu a myfyrio gan ddefnyddio offer digidol. Y tu hwnt i raddio, ein nod yw paratoi myfyrwyr ar gyfer pa lwybr bynnag y maent yn dewis ei ddilyn, gan eu galluogi i gyflawni'r safonau personol a phroffesiynol uchaf posibl ac i ateb y galw cynyddol gan gyflogwyr am raddedigion i gael sgiliau sy'n addas ar gyfer gweithle'r 21ain ganrif.
Mae manteision sefydliadol datblygu sgiliau digidol yn canolbwyntio'n bennaf ar wella ac esblygu ein prosesau, effeithlonrwydd, ansawdd ac arfer da. Mae gan sefydliad sydd â gallu digidol fantais gystadleuol a gall ffynnu yn wyneb cystadleuaeth gynyddol gan sectorau addysg uwch sy'n tyfu ledled y byd. Drwy roi’r wedd ddigidol wrth galon popeth a wnawn a datblygu sgiliau ein staff a'n myfyrwyr i alluogi hyn, gallwn sicrhau bod y Brifysgol yn ffynnu mewn byd sy'n fwy ac yn fwy cysylltiedig a chystadleuol.